Chrigu‘s Ländlermeitschi

🤍„Musig isch d‘Sprach wo mir aui verstöh“🤍

Mir, Chrigu’s Ländlermeitschi, si äs jungs, dynamisches u ufgsteuts Ämmitaler-Schwyzerörgeliquartett.

Ganz bsunngers am Härz ligts üs, die traditionelli u bodeständegi Volksmusig ufrecht z’erhaute u zum Teil sogar euteri Kompositione wieder nöi la uf ds Läbe.

Öb ä rassige Marsch, äs lüpfigs Föxli, oder ä liebleche Walzer, mir umrahme öie Alass mit abwechsigricher u waschächter Berner Örgelimusig.

Viu meh aber, wete mir öich gar nid verrate, losit doch grad säuber dri oder no besser, dir sit a üsem nächschte Alass live derbi!

„ Musig isch d‘Sprach wo mir aui verstöh“

Danke füre Bsuech uf üsere Website, lueget düre u loset dri… Viu Spass!!

Start: Wiukomme

MIR VIERI

Esther, Corinne, Fabienne, Chrigu

Start: Über üs

ESTHER GURINI & CHRISTIAN BLASER

D’Fröid ar Örgelimusig hei die zwöi scho vo chlin uf gha. Zersch heisi aube no gspannt ihrem Vater uf’d Finger gluegt bim Örgele, bevor dassi när säuber die erste paar Chnöpf hei drückt. Nach flissigem üebe isch schliesslech o dr erst Uftritt cho. Öpe 6 Stück heisi denn i däm Autersheim gspiut.

Zuedäm hei die zwöi regumässig der Örgeliungerricht bsuecht, usech nadisna sache o grad säuber bibrunge!

D’Lideschaft für d’Örgelimusig ischne bis hüt blibe.

Ä bsungregi Fröid heisi gha, wosi zämä miter Corinne uder Fabienne die Formation hei dörfe gründe. Sigs bide Musigüebige, amne Uftritt oder eifach bim sponntane zämä Grille amne Sunntig, scho mängi schöni uh lustegi Stung heisi zämä dörfe erläbe.

Ä gueti Kollegschaft isch entstange u si hoffe, no lang i derä Konstelation chönne zämä Musig ds mache.

CORINNE & FABIENNE MARTI

Dene zwone isch d’Fröid ar Volksmusig so z’säge id Wiege gleit worde.

Scho aus chlini Meitschi, hei si sich hie u da a dene tolle Instrument usprobiert,

wo bi ihrem Vater (Bruno Marti) ir Örgeliwerkstatt gstange si.

D’Fabienne het scho geng meh mit der grosse Bassgige glieböiglet, während Corinne die viele Chnöpf am Örgeli fasziniert hei.

Am erste Uftritt mit ihrem Päpu, isch d’Fabienne ufeme Schämeli näb der Bassgige gstange so dass si o die oberste Tön verwütscht het. D‘Corinne denn öpe im Ungerschueuauter, het grad knapp über ds Örgeli us gseh.

Chli speter ir Oberschueu isch das nüme so cool gsi, weme Volksmusik gmacht u glost het, drum het das denn bi dene beidne ä lengeri Pouse gä.

Hüt knapp 10 Jahr speter si si Stouz uf ihres urchige u traditionelle Hobby u üebes mit ganz viu Fröid us. Je lenger, desto meh steue si o fescht, dasses aus angere aus säubstverständlech isch, zwöi glichgsinnti Musigkollege ds ha, u dass si das ir Esther u i Chrigu gfunge hei, schetze si sehr.

Dass si’s so guet hei ungerenang, hoffe si, ghörtme ihrer Musig o a.

Start: Über üs